………….

ياااااااااااااااااااااارب

زيزي :@

من كام يوم، اكتشفت إني أقدر أوَصَف كل حاجة بكرهها في الحياة بكلمة واحدة

“زيزي”

أيون

زيزي، واحدة معايا في الشغل، المثال الحي للفهلوة !

عك منقطع النظير، زيرو ضمير، لا مبالاة واستهتار، أجدع من يفبرك حجج.. والنتيجة “العدد في اللمون” !

المفروض نقول، بما إن صاحب الشغل عاجبه وضع زي دا إحنا مالنا، ودا اللي الكل اتبعه معاها

لكن في النهاية.. بيعك على دماغنا احنا! ونتقارن بيها، وبتكسب المقارنة لأن العدد في اللمون !!

حاولت أبقى زيها، لمدة خمس دقايق ما قدرتش ! ماعرفتش

في حاجة فوق كتفي، ممكن أسميها جزمة قديمة عادي

الجزمة القديمة اللي فوق دي للأسف بتفكر، وللأسف ما بتعرفش تعمل حاجة هي عارفة إنها غلط

بالتالي.. كلنا دمنا بيتحرق، وناس بتسيب الشغل، وناس يجيلها إحباط، وناس تتخانق، وزيزي في ركنها البعيد الهادي، ما بتتأثرش.. مستمرة، نون ستوب.. وعددها في اللمون!

وشعارها دايمًا إن التكرار بيعلم الزوار

وإيه يعني لما نغلط مثلاً!! موتنا مريض؟ دا الدكتور شخصيًا بيغلط

 

أمَّا أَنا، فأقول لاسمي: أَعْطِني ما ضاع من حُرِّيَّتي!

محمود درويش

الخروج

Reblogged from orabize:

أعلم أن الغالبية الكاسحة من جموع الشعب المصرى مشغولة الفكر هذه الأيام بكيفية الخروج من هذا النفق المظلم الذى تسير فيه البلاد دون أن ترى بارقة نور تدلها على سبيل الخروج ، و كواحد من هذا الشعب و محب لهذا البلد و يشغله كثيرا ما يجرى فيه من أحداث فكرت كثيرا فى كيفية الخروج من الأزمة الحالكة التى تضرب مصر بشدة منذ أن أعلن الرئيس المخلوع تخليه عن السلطة للمجلس العسكرى فى 11 فبراير 2011.

كلام محترم جدًا، بس مين يسمع وينفذ

يوم رايق

صحيت بدري، مبسوطة لأني حلمت حلم حلو، صحيت مرتاحة مش مرتبطة بأي ميعاد، ولا مضطرة أقوم!

جسمي مش مكسر زي كل يوم، ماشفتش أي حد من اللي بيضايقني إني اشوفهم،

غسلت وشي، ولقيت نفسي رايقة فغسلت سناني،

بصيت في المراية وانا بغسل سناني، لقيتني مش خاسة، مافيش تحت عيني اسود،

عملت لنفسي كوباية نسكافيه ( من اللي بيعمل إشنبة) .. فتحت شبابيك أوضتي،

طلعت الشقة اللي فوق، استمتعت بريحة الندى، والشمس اللي لسة كسلانة تمشي لحد نص السما،،

قعدت اتفرج على صور مبهجة، شغلت منير وفيروز، وجاهدة وهبي، ودنيا مسعود،،

طق في دماغي إني أعمل أكلة نفسي فيها، نزلت لبست، وخرجت جبت اللي محتاجاه،،

دخلت المطبخ، وشغلت منير، واندمجت في الروقان….

بعد ما عملت الأكل بمزاج، جهزت لنفسي سفرة شيك وعزمت نفسي على الغدا وانا بتفرج على التليفزيون،

بعدها خرجت اتمشيت شوية ساعة المغربية، اشتريت وانا راجعة آيس كريم، ولب وسوداني، وفيشار،

قعدت اقرأ، لحد ما ارتويت، بعدها دخلت نت لحد ما زارني النوم،

*************

إيه الغلط في اليوم دا بقى؟ عايزة افهم؟

ليه مش قادرة أعيش اليوم الرايق دا لحد دلوقتي!!!

نفسي يارب

دي اسمها قلة أدب :@

لما تبقى بني آدم في كامل صحتك وتشحطط المريض، وتتحكم فيه وتفرض عليه اختيارات ما تريحهوش

علشان خاطر سيادتك مش عايز تتعب عشان تشوفه تبقى بجد قلة أدب :@ خاصة إنه ما طلبش منك تتعب نفسك وتيجي!!

عالم مستفزة وتحرق الدم بجد

سيبك انتَ

أي نعم أنا مبقوقة من حاجات كتير .. بس سيبك انتَ

كفاية الإحساس اللي حاسة بيه دلوقتي وانا بستمتع بأول حاجة من ” حر مالي”

أول مرة اشتري حاجة بفلوسي أنا، بفلوس شغلي وتعبي

مش فلوس العيدية مثلاً

الصبر طال .. والحلم دوخني .. بس الإحساس دا يستاهل

بصراحة .. أدمنته !

أنا مش عارفة الناس اللي بيبقى معاها فلوس وما تصرفهاش دي بتفكر إزاي!